Esta Reserva vai dirixida a proporcionar apoio aos Estados membros, as rexións e os sectores máis afectados polas consecuencias adversas da retirada do Reino Unido da Unión; e en particular contribuirá ás medidas específicas establecidas polos Estados membros para axudar ás empresas e os sectores económicos, os traballadores, as rexións e as comunidades locais que sofren o impacto do final do período de transición.
En concreto, a contribución financeira da Reserva só apoiará o gasto público directamente relacionado coas medidas adoptadas especificamente polos Estados membros para contribuír aos obxectivos establecidos no correspondente regulamento, e poderá cubrir, en particular, o seguinte:
- a) medidas para axudar ás empresas e comunidades locais afectadas negativamente pola retirada;
- b) medidas de apoio aos sectores económicos máis afectados;
- c) medidas de apoio ás empresas e comunidades locais que dependen das actividades pesqueiras en augas do Reino Unido;
- d) medidas de apoio ao emprego, mesmo mediante plans de traballo de curta duración, reciclaxe e formación nos sectores afectados;
- e) medidas para asegurar o funcionamento dos controis fronteirizos, aduaneiros, sanitarios e fitosanitarios, de seguridade e pesqueiros, así como a recadación de impostos indirectos, incluíndo persoal e infraestruturas adicionais;
- f) medidas para facilitar os réximes de certificación e autorización de produtos, para axudar a cumprir os requisitos do establecemento, para facilitar a etiquetaxe e o marcado, por exemplo, para as normas de seguridade, saúde e medio ambiente, e para axudar ao recoñecemento mutuo;
- g) medidas de comunicación, información e sensibilización de cidadáns e empresas sobre os cambios derivados da retirada dos seus dereitos e obrigas;
- h) medidas destinadas á reintegración dos nacionais da UE que abandonaron o Reino Unido como consecuencia da retirada;
- i) asistencia técnica para a xestión, seguimento, información e comunicación, resolución de reclamacións e control e auditoría da Reserva, limitada ao 2,5% da asignación de cada Estado Membro.
Canto á asignación, a totalidade ascende a 5 000 millóns de euros (a prezos de 2018), que se asignarán provisionalmente por adiantado aos Estados membros.
O 80 % do importe total, é dicir, 4 000 millóns de euros, desembolsarase como prefinanciación: 1 600 millóns de euros en 2021, 1 200 millóns de euros en 2022 e 1 200 millóns de euros en 2023.
Dos 1.000 millóns restantes poderase dispor en 2025, e o modo en que se compartan dependerá da maneira en que se gastou o financiamento nos anos anteriores, tendo tamén en conta as cantidades non utilizadas.